Sikop ang giila nga Top 1 Most Wanted Person sa provincial ug municipal level human masilbi ang warrant of arrest sa gipahigayong joint operation sa Sitio San Isidro, Barangay Lumbia, Dakbayan sa Cagayan de Oro niadtong Septyembre 12, 2026 sa hapon.
Giila ang nadakpan nga si Lester Boro Acaja, 32-anyos, nga molupyo sa Purok 4, Dominorog, lungsod sa Talakag, Bukidnon. Nag-atubang ang suspek og kasong Sexual Assault, Statutory Rape, ug tulo ka counts sa Rape subay sa Warrant of Arrest nga gipagawas niadtong Hulyo 30, 2026. Walay pyansa nga girekomendar alang sa kasong statutory rape ug rape, samtang ₱100,000 naman ang pyansa alang sa sexual assault.
Ang maong operasyon gipahigayon sa Talakag Municipal Police Station kauban ang CDO City Police Station 8, 2nd Bukidnon PMFC, PIU-BukPPO, ug 1004th RMFB 10 subay sa taho ni BukPPO Director PCOL Oliver Sotto Navales. Kasamtangang gitanggong sa Talakag MPS ang suspek alang sa pormal nga dokumentasyon ug disposisyon sa korte.