Gipahibalo sa Film Academy of the Philippines (FAP) nga ang pelikulang “Filipiñana” maoy opisyal nga entrada sa nasod alang sa Best International Feature Film sa 99th Academy Awards o 2027 Oscars.
Ang maong black comedy drama nga gisuwat ug gidirek ni Rafael Manuel nag-unod sa usapin sa dibisyon sa katilingban ug pagpahimulos sa mga trabahante pinaagi sa panaw sa usa ka batan-ong babaye sa usa ka eksklusibong golf course. Makadawat ang maong pelikula og pinansiyal ug estratehikong tabang gikan sa kagamhanan alang sa ilang kampanya sa Estados Unidos, subay sa pahayag ni FAP Director General Paolo Villaluna.
Gikatakdang ipagawas ang opisyal nga shortlist sa Disyembre 15 samtang ang talaan sa mga nominado ipahibalo sa Enero 21, 2027, sa dili pa ang mismong Oscars ceremony sa Marso 14, 2027 sa Los Angeles, California.