Gipahibalo sa Vatican nga dili sila mulakip sa “Board of Peace” nga gipangunahan ni US President Donald Trump, ang pundok nga gitahasan sa pagdumala sa rekonstruksyon ug pagdumala sa Gaza. Gikumpirma ni Vatican Secretary of State Cardinal Pietro Parolin nga ang Holy See dili muapil sa maong board tungod sa kinaiya sa maong pundok.
Atol sa iyang pamahayag, gihisgutan ni Cardinal Parolin ang kalambigitan sa Italya isip usa ka observer sa maong board, diin iyang namatikdan nga dunay mga punto nga katingalahan ug mga kritikal nga isyu nga angay pa nga mahatagan og kasulbaran. Gipasiugdahan sa Kardinal ang baruganan sa Vatican nga kon bahin sa internasyonal nga lebel, ang United Nations (UN) gayod ang angay nga manguna sa pagdumala sa mga sitwasyon sa krisis sa tibuok kalibutan.
Bisan pa man kon kapin sa 25 ka nasud na ang nipahayag sa ilang suporta ug partisipasyon sa Board of Peace, daghan usab nga mga dagkong nasud ang nibalibad sa imbitasyon ni Trump. Lakip sa mga nasud nga dili moapil mao ang New Zealand, United Kingdom, Germany ug France. Ang pagdumili sa Vatican nagpakita sa ilang padayon nga paghatag og bili sa papel sa UN sa pagpanguna sa mga internasyonal nga paningkamot alang sa kalinaw.
Sa laing bahin, nipadayag usab og kabalaka ang Vatican Secretary of State mahitungod sa nagpadayon nga gubat sa Ukraine, pipila ka adlaw sa dili pa ang ika-upat nga anibersaryo sa pagsugod sa panagsangka tali sa Ukraine ug Russia karong Pebrero 24. Matud ni Cardinal Parolin, hangtod karon wala pay nakitang pag-uswag sa panaghisgot alang sa kalinaw tali sa duha ka nasud human sa upat ka tuig nga gubat.