Gibutyag sa World Health Organization (WHO) niadtong milabayng adlaw nga ang mga biktima sa Hantavirus sa barkong Hundius sa Atlantic Ocean, posibleng nataptan na sa wala pa mosakay sa cruise ship, ug posibleng human-to-human transmission ang nahitabo.
Nakadawat ang ahensya og mga report bahin sa pag-ulbo sa hantavirus sa barkong Hundius niadtong Mayo 2, diin pito sa 147 ka mga pasahero ug tripulante ang gitaho nga nasakit, ug tulo na ang natala nga namatay.
Sa karon, matud ni Maria Van Kerkhove, hepe sa Epidemic and Pandemic Preparedness and Prevention sa WHO, nagpabilin nga dili klaro ang sitwasyon.
Gipasiugda ni Kerkhove nga ang sitwasyon hugot nga gibantayan, ug isip pag-amping, gihangyo ang mga pasahero nga magpabilin sa ilang mga cabin samtang gihimo ang disinfection ug uban pang mga lakang sa panglawas sa publiko.
Subay niini, ang barko gikatakda nga magpadayon sa Canary Islands, Spain, ug ang WHO nakigtambayayong sa mga awtoridad sa Espanya aron mohimo og kompleto nga imbestigasyon sa epidemiolohiya, alang sa tukmang aksyon.