Gi-imbestigahan karon sa mga awtoridad sa Italy ang usa ka lalaki human makaplagan sa iyang bagahe ang uga nga ulo sa usa ka gikaingong endangered nga buwaya.
Ang pasahero miabot sa Caselle Airport gikan sa Miami, Florida.
Atol sa inspeksyon sa iyang bagahe, nadiskobrehan sa customs police ang ulo sa buwaya nga giputos lamang sa ordinaryong wrapping paper.
Gikumpiska dayon sa mga awtoridad ang specimen ug gisailalom sa imbestigasyon ang lalaki tungod sa giingong pagdala sa parte sa usa ka protected species nga walay gikinahanglang permit o certificate.
Kon mapamatud-ang nakalapas sa balaod, magmulta kini og tali sa 20,000 hangtod 200,000 euros o makasentensiya og unom ka bulan hangtod usa ka tuig nga pagkabilanggo.
Ang mga buwaya protektado ubos sa Washington Convention o CITES, nga nagtumong sa pagpugong sa ilegal nga pagbaligya sa mga endangered nga hayop ug tanom.
Bisan pa nga adunay mga tindahan sa Florida nga namaligya og uga nga ulo sa buwaya isip souvenir, mahimong ilegal ang pagdala niini ngadto sa laing nasud kung walay hustong dokumento o permit.