Gipatin-aw ni Atty. Sunny Matula, presidente sa Federation of Free Workers nga naghisgot sa isyu sa contractualization o “endo” nga bisan pa sa daghang tuig nga saad sa nagkalain-laing administrasyon, nagpabilin gihapon kini nga problema sa nasud.
Sumala ni Matula, usa sa mga rason nganong nagpadayon ang labor-only contracting mao ang ubos kaayo nga penalty sa ilawom sa Labor Code.
Ang multa gikan ra ₱1,000 hangtod ₱10,000, nga kon itandi sa kadako sa mga kompanya, dili kini igo nga makapahadlok o makapahunong sa paglapas sa balaod.
Tungod niini, bisan pa og ilegal ang labor-only contracting, adunay mga kompanya nga nagpadayon gihapon niini gumikan gamay ra ang silot kung masakpan.
Gisgutan usab niya ang problema sa gobyerno mismo, diin daghang contract of service ug job order workers sa local ug national agencies, ug sa mga government-owned and controlled corporations.
Matud ni Matula, nga kining mga trabahante giisip nga “naa sa purgatoryo” tungod kay dili sila tinuod nga empleyado sa gobyerno o sa pribadong sektor, mao nga wala silay GSIS ug limitado ang ilang benepisyo.
Matod pa sa abogado, posibleng moabot sa usa ka milyon ang job order ug contract of service workers sa tibuok Pilipinas, ug giingon nga kini usa ka seryosong isyu sa labor security nga kinahanglan tutukan sa gobyerno.