Gipasiugda sa usa ka abogado ug labor advocate nga kinahanglan palig-onon sa gobyerno ang mga programa sa pagmugna og trabaho human mosaka sa 5.1% ang unemployment rate sa Pilipinas, nga katugbang sa kapin 2.6 milyon ka Pilipino nga walay trabaho.
Sa pakighinabi sa Bombo Radyo Malaybalay kang Atty. Sonny Matula, presidente sa Federation of Free Workers, gipadayag niini nga ang epekto sa nagpadayon nga krisis sa ekonomiya ug panginabuhi sa mga katawhan, busa kinahanglan nga ang gobyerno mismo maoy manguna sa paghimo og dagkong proyekto nga makahatag og trabaho sa publiko.
Lakip sa gihisgutan ang pagpadali sa dagkong infrastructure projects sama sa tulay nga nagkonektar sa Bataan ug Batangas, nga gilauman makahatag og trabaho sa liboan ka construction workers.
Gisugyot usab ang pagpalapad sa housing projects sa mga probinsya aron dugang nga mamugna og trabaho alang sa sektor sa konstruksyon.
Gipasiugda usab ang paghatag og subsidya ngadto sa gagmayng negosyo aron mapalig-on ang ilang operasyon ug mapadayon ang pag-empleyo sa ilang mga trabahante.
Gidugang sa abogado ang sitwasyon karon sa “New Deal” program ni kanhi U.S. President Franklin D. Roosevelt atol sa Great Depression, diin gipadako ang social protection, infrastructure projects, ug suporta sa mga mamumuo aron mapalig-on ang ekonomiya.
Matud ni Matula, posible usab kini mabuhat sa administrasyon ni President Ferdinand Bongbong Marcos basta adunay lig-on nga political will aron mapanalipdan ang panginabuhi sa mga Pilipino ug mapakunhod ang kawalay trabaho sa nasud.