Gisiguro ni Department of Agriculture (DA) Secretary Francisco Tiu Laurel Jr. ang dinaliang aksyon sa pagsaka sa food inflation nga miabot sa 6.1%.
Sumala sa Philippine Statistics Authority (PSA), mi-paspas ang food inflation sa Abril diin naapektuhan kini sa pagsaka sa presyo sa bugas, mais, isda, ug mga utanon.
Gipasabot sa kalihim, bisan pa og igo ang suplay sa pagkaon sa nasud, ang taas nga presyo sa petrolyo maoy nakaapekto sa gasto sa transportasyon ug logistics, nga mibug-at sa presyo sa mga palaliton.
Tungod niini, gi-revive sa DA ang food lanes diin gitangtang ang toll fees para sa mga agri truckers ug gipaminusan usab ang port charges.
Gipalapdan usab ang market monitoring aron malikayan ang sobra nga patong sa presyo, samtang gipadayon ang mga programa sama sa Benteng Bigas ug Rice-for-All para sa mas baratong bugas.
Andam usab ang gobyerno sa pagpahamtang og price cap nga P50 kada kilo sa imported rice kung magpadayon ang pagsaka sa presyo.
Sumala sa DA, padayon ang ilang mga lakang aron mapahinay ug mapapaubos ang inflation sa pagkaon, samtang gitabangan usab ang mga mag-uuma sa pagpalambo sa ilang produksyon sa palay, mais, ug uban pang produkto sa agrikultura.