Nangayo og dugang nga suporta gikan sa gobyerno ang sektor sa transportasyon tungod sa padayong pagsaka sa presyo sa krudo nga nakaapekto sa kita sa mga drayber.
Matud ni transport sector representative Marvin Sardido Ferrando, dili igo ang kasamtangang plitehan aron matubag ang nagkadakong gasto sa operasyon sa mga pampublikong sakyanan.
Gipasabot ni Ferrando nga dako ang bahin sa diesel sa adlaw-adlaw nga gasto sa mga pampublikong sakyanan, samtang limitado usab ang madugang sa pamasahe tungod sa kapasidad sa mga pasahero.
Samtang, giingon sa sektor nga kinahanglan usab nga timbangon ang epekto sa pagsaka sa plitehan ngadto sa mga pasahero, ilabi na sa mga nagdepende sa pampublikong transportasyon matag adlaw.
Gawas sa dugang nga tabang pinansyal, gisugyot usab sa sektor ang dugayng programa sa gobyerno aron makatabang sa mga drayber ug ilang pamilya nga makadugang og panginabuhian.
Giawhag sa transport sector ang gobyerno nga dili lamang temporaryong ayuda ang ihatag, kundili dugayng programa sama sa training ug kapital aron makatabang sa mga drayber nga makabarog sa kaugalingon taliwala sa pagsaka sa gasto sa panginabuhi ug operasyon.