Tingkagol na sa selda sa kapulisan ang giilang Top 3 Most Wanted Person sa probinsyal nga lebel human malampusong nadakpan sa gihimong operasyon sa Barangay Laligan, dakbayan sa Valencia, niadtong Abril 17.
Giila ang dinakpan nga si Jayson Subrebega Taban, 29-anyos, usa ka mag-uuma ug residente sa maong dapit. Sikop ang suspetsado pinaagi sa gahum sa warrant of arrest sa kasong paglapas sa New Anti-Carnapping Act of 2016 kun Republic Act 10883.
Gimando sa korte ang piyansa nga mokabat sa 150-mil pesos alang sa iyang temporaryong kagawasan. Sa pagkakaron, anaa na sa kustodiya sa Valencia City Police Station ang suspetsado alang sa saktong dokumentasyon ug disposisyon.
Ang maong pagkasikop kabahin sa gipakusgang kampanya sa kapulisan sa Bukidnon batok sa mga indibidwal nga duna’y pending nga mga kaso ug padayong nagtago sa balaod.