Patay ang usa ka 47-anyos nga lalaki human kini gitigbas sa iyang silingan sa Purok Pine Tree, Barangay Agusan Canyon, lungsod sa Manolo Fortich, niadtong Sabado sa gabii, Abril 18.
Base sa imbestigasyon sa Manolo Fortich Municipal Police Station, nasayran nga duna nay daang panagbangi ang biktima ug ang 43-anyos nga suspek. Giingong matag magkita ang duha, kanunay kining magkalalis diin gina-ingon nga gihulga sa biktima ang suspek. Tungod sa kapungot human sa laing hugna sa panaglalis niadtong gabhiona, mikuha og bolo ang suspek ug gitigbas sa makadaghang higayon ang biktima.
Gidala pa sa rescue team ang biktima sa labing duol nga tambalanan apan gideklarar kining dead on arrival. Samtang ang suspek, boluntaryo usab nga mitahan sa iyang kaugalingon ngadto sa mga awtoridad human sa maong krimen.
Sa pagkakaron, ang suspetsado anaa na sa kustodiya sa kapulisan alang sa saktong dokumentasyon ug pagpasaka og kasong murder, samtang padayon pa ang lawom nga imbestigasyon sa maong insidente.