Hingpit nga nanawagan ang kabanay sa biktima nga motahan na ang suspetsado alang sa tinguha nga maangkon ang hustisya, human brutal nga paglugos ug pagpatay sa maong nuwebe anyos nga bata sa Sitio Encalbog, Barangay Can-ayan, Malaybalay City. Sa eksklusibong pakighinabi sa Bombo Radyo Malaybalay ngadto kang Eva Licayan, ang apohan sa biktima, nanghanyo kini nga mahatagan og hustisya ang brutal nga gidangatan sa iyang apo samtang nagbangutan kini sa hilabihang kasubo.
Sa pikas bahin, gikakurat usab sa amahan nga si Evan Licayan ang hinanaling kamatayon sa iyang anak diin wala kini magdahom sa maong trahedya. Saysay niini, natingala na lamang siya sa dihang nakita ang presensya sa kapulisan sa dapit sa iyang inahan sa Encalbog ug didto nasuta nga wala na ang iyang pinalanggang anak.
Gipadangat ni Evan ang iyang pagmahay sanglit hilabihan ang iyang pagpangga sa biktima apan dili na kini niya makauban pa.
Subay niini, nagtanyag og P50,000 nga ganti si City Councilor Jason Chad Ayala alang sa bisan kinsa nga makahatag og impormasyon nga mosangpot sa pagkasikop sa suspetsado. Ang maong tanyag gihimo sa konsehal aron mapadali ang pagkab-ot sa hustisya sa biktima nga giingong gipailalom pa sa torture sa wala pa gilabay sulod sa sako.
Sa pagkakaron, gipahigayon na ang usa ka hot pursuit operation sa mga otoridad batok sa suspetsado kinsa giila nga residente sa Alanib, Lantapan ug nasayran nga duna nay giatubang nga kasong murder kaniadto sa maong lungsod.