Nag-atubang og daghang kaso ang 15-anyos nga menor de edad sa Wiesbaden human mangawat og pampasaherong bus aron sundoon ug ihatod ang iyang uyab sa eskwelahan sa laing lungsod.
Sumala sa report, nakasulod kini sa usa ka bus depot alas 6:00 sa buntag niadtong Biyernes, ug nakuha ang master key diin nadala ang bus nga wala dayong namatikdi, tungod gituohang sa mga trabahante nga lehitimong drayber lamang kini nga nagbiyahe.
Pinaagi sa GPS tracker, dali nga natultolan sa kapulisan ang bus sa Karlsruhe, nga kapin 130 kilometros ang gilay-on gikan sa Wiesbaden, ug didto naimbargo ang sakyanan.
Nakit-an sa maong dapit nga ang nagmaneho mao ang menor de edad uban ang iyang 14-anyos nga uyab human gisundo gikan sa eskwelahan.
Gipadayag sa kapulisan ang kahibulong kung giunsa niya pagkuha sa yawe ug pagmaneho sa dakong sakyanan, ug karon giatubang niini ang mga kasong pagpangawat ug pagdrayb nga walay lisensya, bisan pa nga walay nahitabong aksidente.