Giklaro ni Senador Francis Escudero nga walay kalabotan sa bisan unsang political accommodation o pabor ang iyang pagtambong sa plenaryo niadtong Hunyo 3 ug ang iyang pag-apil sa grupo nga giila karon isip bloc ni Senador Sherwin Gatchalian.
Matud ni Escudero, ang iyang pagtambong gibase sa obligasyon sa Senado nga magpahigayon og sesyon subay sa Konstitusyon, human sa pipila ka adlaw nga wala miuswag ang plenaryo tungod sa kakulang sa quorum.
Gipasabot usab sa senador nga klaro sa Konstitusyon nga dili mahimong padugayon ang paghunong sa sesyon lapas sa gitugot nga limitasyon nga walay pagtugot sa House of Representatives, maong kinahanglan nga magtigom pag-usab ang mga senador.
Gipasiugda ni Escudero, nga dili angay ilambigit ang iyang mga lakang sa Senado sa mga kaso nga iyang giatubang sa Office of the Ombudsman, diin nag-atubang siya og mga reklamong plunder, graft ug malversation nga may kalabotan sa giingong anomalya sa flood control projects nga adunay alegasyong moabot sa ₱586 milyon ang kickbacks.Â
Matud pa ni Escudero, kon adunay direktang impluwensya ang maong mga kaso, dugay na unta nausab ang dagan sa mga isyu batok kaniya.
Giklaro usab sa senador nga ang mga desisyon ug lihok sa Senado dili angay ikonektar sa impluwensya sa ehekutibo tungod kay independente nga sanga sa gobyerno ang Senado.
Ang pagtambong ni Escudero sa sesyon niadtong Hunyo 3 maoy nakapakompleto sa quorum sa Senado human sa pipila ka adlaw nga wala miuswag ang plenary proceedings.
Tungod niini, nahitabo ang pagbag-o sa liderato sa Mataas nga Kapulungan diin giila sa pipila ka senador ang pagpangulo ni Gatchalian isip acting Senate President base sa mga umiiral nga desisyon sa Korte Suprema ug mga naunang precedent sa Senado.
Apan, wala kini dawata sa kampo ni  Senate President  Alan Peter Cayetano nga nagpabilin nga nagbarug sa kasamtangang liderato ug sa pagpadayon sa ilang kontrol sa mga komite.
Sa pagkakaron, nagpadayon gihapon ang pagkabahin sa Senado may kalabotan sa liderato ug nagpadayon usab ang tensyon sulod sa institusyon.