Andam si Acting Senate President Sherwin Gatchalian sa posibilidad nga makigpulong sa kampo ni Senador Alan Peter Cayetano aron hisgutan ang nagpadayong panaglalis sa liderato sa Senado.
Sumala ni Gatchalian nga andam siyang makig-estorya sa tanang senador, lakip ang mga sakop sa minority ug ang kampo ni Cayetano, taliwala sa padayong dili pagsinabtanay sa pagpangulo sa Senado.
Matud ni Gatchalian, importante ang padayong komunikasyon tali sa mga magbabalaod tungod kay usa ra gihapon ang ilang institusyon ug magkahiusa silang mohimo og mga balaod alang sa nasud.
Kahinumdoman nga giimbitar ni Cayetano si Gatchalian pinaagi sa iyang Facebook live alang sa usa ka miting, diin iyang giingon nga adunay siya’y solusyon sa isyu kung kinsa gayod ang “tinuod” nga Senate President.
Sa maong pamahayag, gibarugan usab ni Cayetano nga base sa iyang pagsabot sa legal ug konstitusyonal nga mga batakang balaod, ang lehitimong lider mao kadtong nakakuha og 13 ka boto gikan sa mga senador.
Apan, giklaro ni Gatchalian nga ang kasamtangang tumong sa iyang grupo mao ang pagpasig-uli sa normal nga operasyon sa Senado ug pagsiguro nga magpadayon ang sesyon ug mga pending nga sugyot balaodnon.
Taliwala sa nagpadayong panagbangi sa liderato, nagpabilin nga bukas ang posibilidad sa pakigpulong tali sa duha ka kampo aron malikayan ang dugang pang pagkalangan sa trabaho sa Senado.