Nagpabilin nga dakong hagit sa mga mamumuo sa Pilipinas ang padayong pagsaka sa presyo sa mga palaliton bisan pa man og mikunhod gamay ang inflation niadtong Mayo.
Dugang pa sa economic analyst, padayon nga nagkagamay ang purchasing power sa mga trabahante tungod sa taas nga presyo sa pagkaon, gasolina ug uban pang batakang panginahanglan samtang nagpabilin nga ubos ug halos wala mosaka ang sweldo.
Gibutyag usab niini, nga mas dako ang epekto sa inflation sa mga kabus nga pamilya tungod kay limitado na gani ang ilang kita.
Subay niini, nagkadako ang panawagan alang sa wage increase o pagsaka sa minimum wage aron matabangan ang mga trabahante nga makasabay sa taas nga gasto sa panginabuhi.
Gipasabot usab sa mga economic analyst nga bisan pa man og niubos ngadto sa 6.8 percent ang inflation sa Mayo gikan sa 7.2 percent niadtong Abril, nagpabilin gihapon nga taas ang pressure sa presyo sa mga palaliton ilabina sa pagkaon ug gasolina tungod sa global tensions ug problema sa lokal nga agrikultura.
Samtang, padayon usab ang pagrepaso sa minimum wage sa nagkalain-laing rehiyon sa nasud pinaagi sa National Wages and Productivity Commission aron masuta kung kinahanglan ba ang dugang nga wage adjustment alang sa mga mamumuo.