Nasakmit sa Police Regional Office-10 o PRO-10 og gibana-banaang P1.088 milyon nga kantidad sa gituohang shabu ug nasikop ang duha ka mga indibidwal atol sa buy-bust operation sa Cagayan de Oro City kagahapong aadlawa.
Gipahigayon ang operasyon pasado alas-10 sa gabii sa Purok 4A Hillside, Barangay Gusa, diin nadakpan ang giilang si alyas “Allyn,” 28 anyos, ug alyas “Boy,” 44 anyos, nga susamang residente sa Cagayan de Oro City diin giila nga high-value individual ang unang suspek.
Narekober gikan sa mga suspek ang pito ka heat-sealed plastic sachet nga adunay gibanabanang 160 gramos nga suspected shabu, nga adunay Standard Drug Price nga P1.088 milyon. Nakuha usab gikan sa posisyon niini ang brown sling bag, gamay nga rectangular container ug P1,000 nga buy-bust money.
Karon anaa na sa kustodiya sa Maharlika Custodial Facility sa COCPO ang duha ka suspek alang sa dokumentasyon ug hustong disposisyon. Giandam na ang kaso batok kanila tungod sa paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002.
Samtang, gidala sa Regional Forensic Unit-10 sa Patag, Cagayan de Oro City ang nakumpiskang mga drug item alang sa qualitative ug quantitative examination.