Opisyal nang giproklama sa Regional Board of Canvassers o RBOC sa COMELEC ang resulta sa unang Bangsamoro Parliamentary Elections, pipila ka minuto human sa tungang gabii ning adlaw’ng Miyerkules, Septiyembre 16.
Gihimo ang proclamation sa headquarters sa 6th Infantry Division sa Philippine Army sa Datu Odin Sinsuat, Maguindanao del Norte.
Base sa datos sa RBOC, mikabat sa 2,018,478 ka rehistradong botante ang mibotar, katugbang sa 84.34 porsyentong voter turnout sa eleksiyon niadtong Septiyembre 14 sa tibuok Bangsamoro Autonomous Region in Muslim Mindanao o BARMM.
Alang sa 40 ka Regional Parliamentary Political Party o RPPP seats, nakakuha og 16 ka pwesto ang Bangsamoro Federalist Party o BFP, 15 ang United Bangsamoro Justice Party o UBJP, walo ang BARMM Grand Coalition o BGC, ug usa ang Raayat Democratic Party.
Sa district representatives, 15 ka pwesto ang nakuha sa BFP, siyam sa UBJP, unom sa Serbisyong Inklusibo Alyansang Progresibo o SIAP, samtang usa ka pwesto matag-usa ang Progresibong Bangsamoro Party o PBP ug Al Ittihad-UKB.
Sa settler community sector, nakadaog sila Yul Adelfo Olaya ug Mary Ann Arnado.
Samtang napili usab sila Aida Silongan, Sulffy Abbas, Muhammad Nadzir Ebil ug Marjanie Mimbantas-Macasalong isip mga representante sa women, youth, ulama ug traditional leaders sectors.
Samtang, niadtong Agosto 25, 2026, gipili sa Teduray ug Lambangian communities sila Jo Glenna Jover ug Leticio Datuwata isip ilang mga nominado subay sa ilang customary laws.
Ang 80 ka bag-ong napiling miyembro sa Parliament manumpa sa ilang katungdanan sa Oktubre 30 ug sila usab ang mopili sa Chief Minister sa rehiyon.