Giisip sa usa ka grupo sa mga mag-uuma nga “makatarunganon” nga posibleng moabot sa P60 hangtod P62 ang presyo sa kada kilo sa bugas pag-abot sa Setyembre.
Sumala ni Magsasaka Partylist Chairman Atty. Argel Cabatbat, nga bisan pa og adunay pagsaka sa presyo, makatabang kini sa mga mag-uuma aron makabawi sa padayon nga pagsaka sa gasto sa produksyon, ilabina sa pataba o abono.
Apan, gipatin-aw ni Cabatbat nga dili gihapon kini pasabot og dako nga kita alang sa mga mag-uuma gumikan nagpabiling mahal ang presyo sa farm inputs.
Dugang pa niini, kon magtipid sa abono, siguradong moubos ang ani ug mas makaapekto pa gyod kini sa ilang kita.
Naglaum usab ang grupo nga dili na molapas pa sa P60 hangtod P62 ang presyo sa bugas aron dili usab mabug-atan ang mga konsumidor.
Sumala kanila, ang tumong mao ang pagkab-ot sa patas nga presyo alang sa mga mag-uuma ug sa mga konsumidor.
Gipadayag usab ni Cabatbat ang kabalaka sa padayon nga tensyon sa Middle East, nga posibleng makahatag og domino effect sa pagsaka sa presyo sa lana ug uban pang mga palaliton, lakip na ang bugas