Gituohan ni Rep. Percy Cendaña nga posibleng makakuha ang Articles of Impeachment batok kang Bise Presidente Sara Duterte og labaw pa sa gikinahanglan nga one-third nga boto sa Kamara kung kini ipasa na sa plenaryo.
Sumala ni Cendaña nga kumpiyansa kini nga ang ihap sa mga mambabalaod nga moboto pabor sa impeachment mahimong moabot o molapas pa sa minimum nga kinahanglan aron ipadala ang kaso sa Senate of the Philippines isip impeachment court.
Lakip sa mga isyung giatubang sa Bise Presidente mao ang report sa Anti-Money Laundering Council, ang iyang Statement of Assets, Liabilities, and Net Worth (SALN), ug mga alegasyon sa “grave threats.”
Apan gipasiugda nga ang tanan niini mga akusasyon pa lamang ug wala pa napamatud-an sa korte.
Bisan pa niini, gilauman sa mambabalaod nga mapadali ang proseso aron dayon kining mahisgutan sa Senado kung diin magsilbi kini isip Impeachment Court.