Nakadani og atensyon sa daghang tawo ang usa ka plumbing company sa siyudad sa Stavropol, Russia, human kini naglusad og usa ka dili kasagarang kalihukan nga ilang ginganlan og “Game of Thrones: Pagtutubero.”
Sa unang bahin sa kompetisyon, ang mga contestant gipa-inom og non-alcoholic sparkling drink nga gibubo sa bag-ong inidoro pinaagi sa paggamit og dagkong straw. Ang unang makahuman sa pag-inom maoy mideklarang daog sa maong hugna.
Gipahigayon ang kalihukan sulod sa showroom sa kompanya diin dose-dosenang mga partisipante ang nitambong aron makigkompetensya alang sa premyong 100,000 rubles, o kapin ₱79,000.
Gibahin ang mga contestant sa mga grupo nga adunay pito ka miyembro, ug ang labing paspas makahuman sa unang hagit maoy nakaabante sa final round.
Sa katapusang hugna, ang pito ka finalists gipasulod sa laing pagsulay diin gikinahanglan nilang molingkod ibabaw sa siradong inidoro kutob sa ilang mahimo. Ang contestant nga pinakataas nga nakapabiling naglingkod maoy gikoronahang kampyon sa talagsaon ug makalingaw nga patimpalak.