Hugot nga gibasura sa sektor sa mga mamumuo ang gihisgutan sa State of the Nation Address (SONA) sa Presidente kalabot sa ₱350,000 nga tinuig o ₱30,000 matag bulan nga full tax exemption sa mga mamumuo.
Ang maong pagsupak nagsumikad sa pamahayag ni Nick Borja, usa ka labor consultant, diin gipadayag niini nga dili kini ang solusyon sa ilang nasinati nga kalisod.
Matud ni Borja, nga imbes nga tax exemption, mas gikinahanglan sa mga mamumuo sa pribadong sektor ang direktang pag-usbaw o increase sa suholan tungod sa padayon nga pagsaka sa presyo sa mga palaliton.
Gidugang pa niini nga dili kini mapuslan o mabati sa mga ordinaryong mamumuo gumikan ang ilang gipangayo mao ang tinuod nga usbaw sa suhulan.
Dismayado usab ang sektor tungod kay wala gihisgutan o matuki ang gilauman nga “national wage increase across the board” sa tibuok Pilipinas, lakip na ang pag-certify sa panukiduki sa Trade Union Congress of the Philippines (TUCP) alang sa ₱200 across the board wage increase nga giduso sa Kongreso apan wala matud pa paminawa sa kagamhanan.