Posibleng mupatuman ang pipila ka mga pribadong ospital sa nasud nga patas-an ang mga singil ug bayronon.
Matud sa Presidente sa Private Hospitals Association of the Philippines Inc. kon PHAPI nga si Jose Rene de Grano, pipila ka mga kaubanan niini ang nagplano nga usbawan ang bayronon hangtod sa singko porsyento.
Kini nunot sa pagsaka sa presyo sa mga produktong petrolyo nga nakaapekto sa paghatod sa mga suplay sa mga tambal ug uban pang medical supplies.
Gikataho ang mga ospital dili makalihok nga wala’y standby generator, uban sa pipila ka mga ospital nga mobalhin usab sa renewable energy aron makatabang sa mga power utilities, apan kini mahal.
Giklaro niini, nga magdepende gihapon kini kung giunsa pagsagubang sa mga balay tambalanan ang sitwasyon ning kasamtangan.