Pormal nang giila sa pipila ka miyembro sa bag-ong minority bloc ang liderato ni Senate President Sherwin Gatchalian human kini legal nga napili sa posisyon pinaagi sa suporta sa 13 ka senador, subay sa giingon sa Konstitusyon.
Sumala ni Senador Loren Legarda, malipayon siya alang kang Senador Gatchalian ug gihulagway niya kini nga maalamon, disiplinado ug competent lider.
Giila usab niya ang pag-ilis sa liderato sa Senado ug mipahayag nga andam siyang makigtambayayong sa tanan niyang kaubang senador bisan pa sa ilang politikal nga grupo.
Matud usab ni Senador Bong Go nga panahon na aron biyaan ang panaglalis sa liderato ug magpadayon sa pagserbisyo sa katawhan. Naglaum siya nga mobalik na sa normal ug hapsay nga dagan ang trabaho sa Senado ubos sa bag-ong liderato.
Samtang, si Senador Imee Marcos mipili sa pag-abstain sa boto apan mipahayag nga gusto lamang sa minority bloc nga magpadayon sa ilang trabaho ug walay tinguha nga magmugna og kasamok.
Samtang, sumala ni Senador Pia Cayetano, nga wala silay problema sa bag-ong liderato basta kini nagsunod sa Konstitusyon ug sa mga lagda sa Senado
Sa laing bahin, gipadayag sa mga miyembro sa mayorya ang ilang kalipay sa pormal nga paglingkod ni Senador Gatchalian isip Senate President ug nanawagan og kooperasyon gikan sa minority bloc aron mapadayon ang trabaho ug mga responsibilidad sa Senado.