Gisusi na karon sa kapulisan ang nahitabong pagpang-ambush ug pagpangtulis diin natangag ang gibanabanang ₱1,677,000 nga cash gikan sa tulo ka empleyado sa South Bank Libona sa Sitio Miranda, Barangay Damilag, sa maong lungsod, kagahapong adlawa, Hunyo 17.
Sumala sa mga otoridad, sakay sa usa ka sakyanan ang mga biktima aron unta mag-deposito sa ilang koleksyon sa Landbank Manolo Fortich, sa dihang kalit silang gibabagan ug gipamusil sa duha ka armadong lalaki nga sakay og usa ka Ford Ranger Wildtrak.
Misulay pa og dagan ug pagbalos og pusil ang mga biktima apan malampuson gihapon nga nakuha sa mga suspek ang bag nga adunay sulod nga minilyong salapi una paspas nga misibat.
Gikonsidera usab sa kapulisan nga planado ang pagpangtulis sa mga suspek.
Luwas ug walay naangol sa mga empleyado nga padayon karong gipailawom sa imbestigasyon sa Manolo Fortich Municipal Police Station.
Sa karon, dinalian nang naglunsad og flash alarm, dragnet operation, ug hot pursuit ang kapulisan kauban ang SOCO alang sa dinalian nga pag-ila ug pagdakop sa mga mi-eskapo nga suspek.