Gilauman sa House prosecution panel nga mouswag na ang impeachment trial batok kang Vice President Sara Duterte human masulbad ang isyu sa liderato sa Senado.
Sumala ni Lanao del Sur Representative Zia Alonto Adiong, giila sa House of Representatives ang pagkahalal kang Senator Sherwin Gatchalian isip bag-ong Senate President.
Matud ni Adiong, maayong kalamboan kini tungod kay nagpakita na usab og kalig-on ug normal nga dagan sa trabaho ang Senado.
Gipahayag ni Adiong nga respetado sa prosecution panel ang kagawasan sa Senado isip lahi nga institusyon, lakip na ang ilang desisyon kon kinsa ang mahimong presiding officer sa impeachment court.
Apan ilang gipaabot ang tinguha alang sa usa ka paspas ug patas nga pagdungog aron matubag ang mga pangutana sa publiko ug matapos ang kaso sa labing dali nga panahon.
Gisiguro usab ni Adiong nga andam ang prosekusyon sa ilang mga ebidensya ug mga testigo, ug misalig sila nga dili makaapekto ang bisan kinsang molingkod isip presiding officer sa ilang pagpresentar sa kaso batok sa Bise Presidente.