Nagtuo si Pusong Pinoy Party-list Rep. Jett Nisay nga dili na “fit” o angayan nga mangulo sa nasud si Pangulong Ferdinand Marcos Jr.
Kini ang gipahayag sa kongresista dungan sa iyang baruganan nga “sufficient in substance” o adunay igong basehan ang impeachment complaint nga gipasaka batok sa Presidente. Lakip sa mga pasangil batok kang PBBM mao ang culpable violation of the Constitution, betrayal of public trust, ug graft and corruption.
Sumala sa reklamo, gilapas matud pa sa administrasyon ang Konstitusyon tungod sa giingong pag-bypass sa justice system, ilabi na sa isyu sa pakig-alayon sa International Criminal Court (ICC). Gilakip usab sa reklamo ang alegasyon mahitungod sa pagdala kang kanhi Pangulong Rodrigo Duterte ngadto sa ICC, nga gihulagway sa mga nagreklamo nga usa ka matang sa kidnapping ug paglapas sa soberanya ug katungod sa due process.
Dugang pa ni Nisay, importante ang moral nga pananagutan sa gobyerno, ilabi na sa paggamit sa pondo alang sa seguridad imbes nga itubag sa mga nag-unang panginahanglanon sa mga lungsoranon. Gihisgutan usab sa reklamo ang padayong problema sa ilegal nga droga nga wala matud pa epektibong natubag sa kasamtangang administrasyon.