Gibarugan ni House Committee on Good Government and Public Accountability Chair Rep. Joel Chua nga adunay legal nga otoridad ang House Justice Committee sa pagkuha sa tax records ni Vice President Sara Zimmerman Duterte.
Matud ni Chua nga ang gihimong pagpa-subpoena sa panel ngadto sa Bureau of Internal Revenue (BIR) para sa pagpagawas sa income tax returns (ITRs) sa Bise Presidente sakop sa ilang gahum isip komite sa Kamara.
Sumala sa mambabalaod, ang Kongreso adunay constitutional authority sa pagbutang og kaugalingong rules ug lakip na niini ang pag-isyu og subpoena aron makuha ang mga dokumento nga gikinahanglan sa imbestigasyon.
Gipatin-aw usab ni Chua nga bisan pa og adunay balaod nga nagaprotekta sa confidentiality sa tax records, ang subpoena power sa Kongreso naghatag og awtoridad sa Kamara sa pagkuha niini kung may kalabotan sa imbestigasyon.
Dugang pa ni Chua, bisan wala giabli ang “green box” nga naglangkob sa tax records ni VP Sara, legal gihapon ang proseso nga ilang gisunod aron malikayan ang posibleng legal nga hagit o pagpangayo og temporary restraining order (TRO) sa Korte Suprema.
Kahinumduman nga miuyon ang mga miyembro sa komite nga dili na ablihan ang maong green box aron mapadayon ang imbestigasyon nga walay makitang technical issue nga magrason ang kampo sa Bise Presidente.