Gipanghimakak ni Attorney Manases “Mans” Carpio, ang giingong kapin ₱6 bilyon nga mga bank transactions nga gilambigit kaniya sa mga bangko.
Sumala sa abogado niini nga si Attorney Peter Paul Danao, nagkahisgot sila ni Atty. Carpio ug klaro nga gihimakak niini ang maong alegasyon.
Matud ni Danao nga wala sila gihatagan og kopya sa mga dokumento o report sa Anti-Money Laundering Council (AMLC), busa lisod alang kanila ang pagkomento o pag-uyon sa mga datos nga gipagawas sa House Committee on Justice.
Dugang pa niini, imposible nga makahatag sila og klarong tubag kung wala nila makita ang aktuwal nga detalye sa mga transaksyon nga sumala sa AMLC.
Sa kasamtangan, gipadayag sa kampo ni Carpio nga ang maong mga alegasyon usa ka “black propaganda” ug political harassment batok sa Bise Presidente ug sa ilang pamilya.
Gipasiugda usab ni Danao nga kinahanglan ipakita sa ilang kampo ang kopya sa mga transaksyon aron makahatag sila og tukmang klaripikasyon ug depensa.
Samtang, sumala sa report sa AMLC sa House Justice Committee nga adunay kapin ₱6 bilyon nga “suspicious” ug “covered” transactions nga nalambigit sa magtiayong Duterte-Carpio, diin adunay pondo nga misulod, migawas, ug uban pa nga wala matino ang tinubdan.
Bisan pa niini, padayon ang pagbarog sa kampo ni Carpio nga ang pagpagawas sa bank records sa publiko usa ka klarong paglapas sa balaod.