Gipahayag sa tigpamaba sa Valencia City Mayor’s Office nga si Jun Galario nga anaa na sa mga kamot sa Sangguniang Panlungsod ang desisyon kon iduso ba ang deklarasyon aron mamahimong Highly Urbanized City o HUC ang dakbayan. Matud ni Galario, kinahanglan pa kining tun-an og maayo sa konseho una magpasa og resolusyon ngadto sa Palasyo, tungod kay dako kini og bentahe sa dugang pondo apan nagpabiling bahin pa ang sentimento sa mga mambabalaod bahin niini.
Sa pagkakaron, ang Valencia nagpabilin nga usa ka Component City apan nakapasar na sa qualifications sa HUC nga naglakip sa lokal nga kita nga dili momenos sa 50 milyones ka pesos ug populasyon nga miabot na sa duha ka gatos ka libo (200,000).
Sa pikas bahin, nagpagawas usab og komento si Galario kalabot sa dagan sa Senado, diin iyang gitawag nga daw “drama” ang mga panghitabo may kalabutan sa impeachment trial ni Bise Presidente Sara Duterte. Bisan pa man sa pagsaway sa pipila ka katawhan sa pag-apil ni Senador Migz Zubiri sa Minority Bloc, nagtuo si Galario nga mobotar gihapon og “NO” batok sa impeachment ang senador nga taga-Bukidnon kon magsugod na ang pormal nga botohan.