Gisagubang karon sa delegasyon sa Northern Mindanao ang grabeng kainit sa panahon ug kahuot sa ilang mga lawak-tunghaan sa Agusan del Sur, samtang nagpadayon ang ilang preparasyon alang sa Palarong Pambansa 2026.
Sa pakighinabi sa Bombo Radyo Malaybalay ngadto kay Basketball 3×3 Secondary Boys Coach Jayson Dulhao, iyang giangkon nga dakong adjustment alang sa ilang team ang klima sa maong dapit ilabina nga gikan sila sa bugnaw nga panahon sa Malaybalay City. Bisan pa man niini, dako gihapon ang ilang pasalamat tungod kay adunay aircon ang matag classroom sa Bunawan National High School nga gipuy-an sa kapin pito ka gatos (700) ka mga atleta ug coaches.
Sa pikas bahin, gibutyag ni Chess Trainer Jaime Joshua Frias II nga medyo huot ang ilang billeting area sa Noli National High School human miabot sa 23 hangtod 27 ka atleta ang nagtapok sa matag classroom. Tungod niini, hugot ang ilang pagbantay batok sa mga sakit sama sa dengue, hilanat, ug trangkaso nunot sa taas nga temperatura.
Luyo sa maong mga hagit, nagpabiling determinado ug positibo ang tibuok rehiyon napulo (Region 10) nga makasakmit og mga medalya sa maong makasaysayanong tigi sa paugnat sa kusog.