Gikumpirma sa buhatan sa Land Transportation Franchising and Regulatory Board nga giduso na sa Northern Mindanao Transport Cooperative ang P5.00 nga dugang usbaw sa pamasahe.
Matud ni Aljo Bendijo, JD, ang Regional Director sa Land Transportation Franchising and Regulatory Board (LTFRB) Region 10, nga nakadawat na ang ilang buhatan og pormal nga petisyon alang sa singko pesos (P5.00) nga umento sa pletehan gikan sa maong kooeratiba.
Apan sa pagkakaron mas giprayuridad sa ilang buhatan ang gikatakdang ipang-apod-apod ang fuel subsidy sa rehiyon 10 sa higayon nga andam na ang mga ahensya sa lana sa maong kalihukan.
Gipahibalo ni Bendijo, nga gipaabot na lamang ang go-signal gikan sa Central Office alang sa pagpagawas sa gipaabot nga fuel subsidy alang sa mga driver ug operator sa rehiyon.
Hugot usab nga gipasabot sa direktor nga ang kagamhanan naga-amping pag-ayo sa desisyon kalabot sa pagsaka sa pletehan.
Matud ni Director Bendijo, ang bisan unsang umento sa singil sa transportasyon adunay dakong “inflationary effect” o ang pagtaas usab sa presyo sa mga nag-unang palitonon.