Nag-atubang og dako nga hagit ug pressure ang dakbayan sa Malaybalay tungod sa sunod-sunod nga mga dagkong aktibidad sama sa NMRAA Meet 2026, Charter Day, ug ang umaabot nga Kaamulan Festival.
Kini sumala ni City Sports Coordinator Al Adrian Antipasado ug gipunting niini nga bisan pa man sa maong hagit, gipasalig nga padayon ang hugot nga pagpangandam pinaagi sa makanunayon nga pakig-alayon sa nagkalain-laing ahensya, lakip na ang mga ospital, kapulisan, ug uban pang mga opisina naron masiguro ang hapsay ug malampuson nga pagpahigayon sa maong mga okasyon.
Andam usab na ang dakbayan sa Malaybalay sa pagdawat sa liboan ka mga atleta alang sa umaabot nga Northern Mindanao Regional Athletic Association (NMRAA) Meet.
Kini human gikumpirmar ni Antipasado, nga napahimutang na ang mga pipila ka mga delegado sa mga billeting quarters.
Sumala ni Antipasado, gipakatap sa nagkadaiyang mga tunghaan sa dakbayan ang mga atleta gikan sa lain-laing probinsya ug dakbayan sa rehiyon 10 aron masiguro ang ilang kaharuhay.