Personal nga gitunol ni Presidente Ferdinand Marcos Jr. ang P100 milyon nga pinansyal nga tabang ngadto kang General Santos City Mayor Lorelie Pacquiao atol sa iyang pagbisita sa Mindanao karong adlawa.
Ang maong pondo gamiton alang sa pag-ayo sa nadaot nga General Santos City Hall.
Sumala sa Presidente, ang pondo gikan sa Local Government Support Fund (LGSF).
Gipahibalo usab sa Pangulo nga ang matag pamilya nga adunay namatayan tungod sa linog makadawat og P50,000 nga ayuda.
Maghatag usab og pinansyal nga suporta ang nasyonal nga gobyerno sa mga lokal nga kagamhanan sa Sarangani ug South Cotabato alang sa pag-ayo sa mga nadaot nga imprastraktura, bisan wala pa matino ang eksaktong kantidad niini.
Matud sa Presidente, ang Sarangani mao ang labing grabeng naapektuhang lugar sa Mindanao.
Gimandoan usab ni Presidente Marcos ang mga concernced government agencies sa paspas nga paghatod sa tabang ug rehabilitasyon sa mga lugar nga naapektuhan sa linog.
Gisiguro usab sa Presidente nga aktibo ang National Housing Authority (NHA) sa pagtabang sa mga magtutudlo ug residente nga nadaot ang mga panimalay.
Gawas sa relief goods, pagkaon ug medikal nga serbisyo, gisaad usab sa gobyerno ang pinansyal nga tabang alang sa mga trabahante nga naapektuhan sa temporaryong pagsira sa mga establisyimento ubos sa “no work, no pay” nga polisiya.
Ipang-apod-apod ang maong ayuda pinaagi sa Department of Social Welfare and Development (DSWD) pinaagi sa AICS program ug sa Department of Labor and Employment (DOLE) pinaagi sa TUPAD program.
Subay niini, gimando usab sa Presidente ang paspas nga inspeksyon sa mga nahugnong bilding aron dali silang mabalik sa normal nga operasyon.
Gipadali usab ang pagbukas sa mga nabara nga karsada aron mas sayon ang pag-abot sa mga sakyanan nga nagdala og ayuda ug aron mapasig-uli dayon ang suplay sa kuryente ug tubig sa mga apektadong komunidad.
Naglaom si Presidente Marcos nga mohunong na ang mga aftershocks aron magpadayon nga walay babag ang clearing ug recovery operations sa gobyerno.