Padayon nga misaka ang ihap sa mga namatay human sa magnitude 7.8 nga linog nga miigo sa pipila ka bahin sa niadtong Hunyo 8.
Sumala sa Office of the Civil Defense, niabot na sa 46 ang mga namatay, samtang 630 ang nasamdan ug 17 pa ang padayon nga missing.
Nagpadayon gihapon ang search and rescue operations sa mga lugar nga grabeng naapektuhan sa kalamidad.
Lakip sa bag-ong mga biktimang nakit-an ang usa ka empleyado nga naipit sa nagun-ob nga supermarket sa General Santos City.
Human sa pipila ka adlaw nga pagpangita, narekober sa mga rescuer ang iyang lawas ilalom sa mga debris.
Dako usab ang epekto sa linog sa sektor sa edukasyon.
Kapin sa 1,100 ka eskwelahan sa Mindanao ang nadaot, samtang suspendido pa gihapon ang klase sa mga 8,000 ka eskwelahan.
Sumala sa Department of Education, posible nga moabot og pipila ka bulan una mabalik sa normal ang operasyon sa ubang mga eskwelahan.
Naglisod usab ang mga ahensya sa gobyerno sa paghatod og tabang sa pipila ka lugar tungod sa mga nagubang dalan ug landslide.
Tungod niini, migamit na og mga helicopter ang Armed Forces of the Philippines aron mahatod ang pagkaon, tambal, ug uban pang batakang panginahanglan sa mga komunidad nga lisod maabot.
Matud pa sa Presidente, naibalik na ang kuryente sa mga 85 porsyento sa mga apektadong lugar.
Hinay-hinay usab nga nabalik ang komunikasyon ug suplay sa tubig sa nagkadaiyang komunidad.
Padayon ang panagtinabangay sa mga ahensya sa gobyerno alang sa relief, rescue, ug rehabilitation efforts samtang liboan ka mga pamilya sa Mindanao ang naningkamot nga makabangon gikan sa usa sa labing kusog nga mga linog nga miigo sa rehiyon sa milabay nga mga tuig.