Gipasalig sa probinsyal nga kagamhanan sa Bukidnon ang usa ka hugot nga saad nga suporta ngadto sa komunidad sa Indigenous Peoples (IP) sa tibuok probinsya.
Matud ni Bukidnon Provincial Governor Rogelio Neil P. Roque, lakip sa mga gitun-ang lakang mao ang dinalian nga pag-ila, pag-plastar, ug pag-dokumento sa mga butang nga giisip nga sagrado sa tribu aron kini magsilbing giya ug daling mapasa ngadto sa sunod nga mga henerasyon.
Kini nahitabo human mitambong ang gobernador sa General Monthly Meeting sa Provincial, City, ug Municipal Indigenous Peoples Mandatory Representatives (IPMRs) kagahapon, Mayo 22, 2026, sa Provincial IP Tulogan, Kaamulan Park, Malaybalay City.
Atol sa maong panagtigom, giangkon sa gobernador nga dako kini nga trabahuon ug usa ka dakong hagit alang sa liderato sa mga tribu tungod kay sumala pa niini, nagkagamay na lamang ang nahibiling “100% IP” nga nagsubay ug nagpraktis sa tiunay nga tradisyon ug kultura.
Gipunting niini, nga kung dili kini matubag sulod sa 20 ngadto sa 30 ka tuig, posibleng mawala na ang maong mga bililhong kasaysayan.