Nakab-ot ang talagsaong kalampusan sa usa ka 11-anyos nga si Chaz Wildon gikan sa South Africa human niya mabutang ang iyang ngalan sa Guinness World Records alang sa kategoryang “most splits in one minute (male).”
Naka-record si Chaz og 47 ka splits sulod lamang sa usa ka minuto, nga milabaw sa daang rekord nga 46 nga gihuptan sa usa ka lalaki gikan sa Pakistan.
Nagsugod ang iyang inspirasyon human niya makita sa YouTube ang flexible performer nga si Liberty Barros.
Sa dihang gisulayan niya kini sa ilang balay, nakurat ang iyang pamilya kay dali ra niyang naangkon ang abilidad.
Tungod niini, nagdesisyon si Chaz nga seryosohon ang training.
Misulod siya sa acrobatic dance ug nag-bansay sulod sa walo ka bulan aron mapalig-on ang iyang lawas, mapaayo ang iyang kahapsay sa lihok, ug mapataas ang iyang endurance.
Niadtong Oktubre 2025, gihimo niya ang opisyal nga pagsulay sa entablado sa ilang eskwelahan atubangan sa iyang mga magtutudlo ug klasmeyt.
Matud sa iyang inahan nga si Ariena, dako ang ilang kalipay ug garbo tungod sa dedikasyon ug paningkamot sa bata nga nakahatag kaniya og maong internasyonal nga rekord.