Nagtuo ang usa ka law expert ug kanhi presidente sa Integrated Bar of the Philippines (IBP) nga gamay na lamang ang kalibutan ni Sen. Ronald “Bato” Dela Rosa mahitungod sa mga legal nga kamanduan ug sa posibilidad nga kini arestuhon tungod sa mga giatubang niining isyu.
Matud ni Atty. Eddie Cuaresma, nagkagamay na ang haom nga katagoan ug “legalities” nga mamahimong sandigan sa senador, hinungdan nga giisip niini nga “slim” o gamay na lamang ang tsansa niini nga makalingkawas pa sa maong sitwasyon.
Hinuon giklaro niini nga ang pamahayag putli nga legal nga panan-aw lamang isip usa ka abogado human makadawat og pipila ka mga batikos sa maong pamahayag niini.
Samtang sa pikas bahin, hugot nga gisupak, ang opinyon nga nagkanayon nga mamahimong dakpon sa usa ka abogado ang iyang kaugalingong kliyente nga nag-atubang ug kaso.
Kini human giulan og pagsaway sa nagkadaiyang legal experts ang miguwas nga viral nga pamahayag ni Atty. Jimmy Bondoc, ang legal counsel ni Senador Ronald “Bato” Dela Rosa, nga nagkanayon nga mamahimong ngadto sa mga abogado isilbi o ihatag ang arrest warrant sa iyang kliyente.
Dugang pa ni Atty. Cuaresma, gihulagway niini nga “sayop” ang maong baruganan tungod kay gawas nga supak kini sa kabubut-on sa maong kliyente, dako usab kini nga “conflict of interest” sa parte sa senador.