Padayon ang pag-andam sa dugang nga mga kaso nga isaka may kalabotan sa giingong flood control anomaly sa gobyerno.
Gipadayag ni Ombudsman Jesus Crispin Remulla nga adunay lima hangtod unom pa ka kaso nga planong ipasaka sulod sa duha ka semana, bisan wala siya naghatag og dugang detalye niini.
Gikumpirma usab ni Remulla nga si kanhi House Speaker Martin Romualdez ang mambabalaod nga gi-isyu-an na og freeze order.
Kahinumduman, nga mibutyag ang Anti-Money Laundering Council (AMLC) nga nakakuha kini og freeze order gikan sa Court of Appeals batok sa assets sa usa ka wala gipangalanang mambabalaod nga giingong nalambigit sa flood control corruption scandal.
Sakop sa maong freeze order ang 25 ka bank accounts ug 10 ka insurance policies nga nakapangalan sa maong opisyal.
Sumala sa Ombudsman, kabahin kini sa nagpadayon nga imbestigasyon sa maanomalyang flood control projects sa gobyerno.
Sa kasamtangan, ang mga kaso anaa pa sa preliminary investigation, diin gisiguro nga masunod ang due process, ilabi na nga ang giimbestigahan mga impluwensyal nga personalidad sa gobyerno nga adunay dakong kabtangan ug gahum.