Gipadayag ni House Committee on Justice member Representative Joel Chua nga posible pa nga mas mokabat sa ₱6.7 bilyon ang kinatibuk-ang bank transactions nga nalambigit kang Vice President Sara Duterte base sa report sa Anti-Money Laundering Council (AMLC).
Sumalani Chua, dili pa kini ang tibuok ihap sa transaksyon kay ang AMLC nag-monitor lamang sa mga deposit nga mokabat og ₱500,000 pataas, busa wala masulod ang mas gagmay nga deposito nga posibleng makadugang pa sa total nga kantidad.
Gipatin-aw usab ni Chua nga ang mga bangko obligadong magreport sa AMLC sa mga “covered transactions” ug bisan pa sa mga “suspicious transactions,” bisan dili moabot sa threshold, isip kabahin sa anti-money laundering monitoring.
Matud ni Chua nga importante ang pagsusi sa tibuok galaw sa kwarta aron matino kung adunay paglapas sa balaod, nga kabahin sa mandato sa Kamara sa ilang imbestigasyon sa impeachment complaint batok sa Bise Presidente.
Ang iyang pahayag tubag sa giingon ni Atty. Michael Poa nga “pinalaki” o bloated ang mga numero nga gipagawas sa AMLC, diin giingon sa kampo ni VP Sara nga kinahanglan pa kini og husto ug detalyadong pagsusi.
Dugang pa ni Chua, bisan wala pa ang Income Tax Returns (ITR) sa magti-ayung Duterte, nakit-an na nila ang posibleng discrepancies tali sa SALN, AMLC records, ug SEC records, samtang ang BIR documents nagpabiling dili ma-access tungod sa legal issues.
Padayon karon ang imbestigasyon sa Kamara aron mas mapalalom pa ang pagsusi sa maong mga transaksyon.