Taliwala sa hulga sa El Niño ug sa kalit nga pagbaha sa pipila ka bahin sa lalawigan, gipasalig sa National Food Authority (NFA) Bukidnon nga nagpabilinng igo ang supply sa bugas sa mga bodega, bisan pa man sa nagpadayong epekto dala sa kadaot sa panahon sa sektor sa agrikultura.
Sumala ni Glenn De Otoy, Information Officer sa NFA Bukidnon, adunay hangtod sa 22 ka adlaw nga buffer stock sa bugas nga gitagana ang ilang buhatan alang sa mga emerhensya ug kalamidad.
Gidugang pa ni De Otoy nga adunay nag-unang kahuot ug pag-apud-apod sa stock sa bugas ug humay sa nagkalain-laing strategic warehouses sa lalawigan.
Ang maong pondo sa bugas gigamit usab aron suportahan ang nagpadayong P20 Rice Program sa gobyerno, ingon man ang panginahanglanon sa mga Local Government Units (LGUs) ug uban pang ahensya alang sa mga relief operations.
Bisan pa og nakasinati og pagbaha ang pipila ka humayan sa probinsya nga nakadaot sa pananom sa mga lokal nga mag-uuma, gipatin-aw sa NFA nga wala pay hingpit nga kausaban sa kinatibuk-ang gidaghanon sa mga stock. Apan, giangkon sa ahensya nga adunay epekto kini sa lokal nga sektor sa agrikultura.
Giinsistir ni De Otoy nga andam ang NFA sa paghatag og mga certification ug uban pang tabang alang sa mga naapektuhang mag-uuma aron makabangon gikan sa pagkalugi.