Ipatawag sa pagdumala sa Bukidnon Provincial Medical Center (BPMC) ang usa ka admin aide nga giakusahan sa dili maayong pagtratar sa mga pasyente human kini gireklamo ug mikaylap sa social media.
Gikumpirma ni Dr. Miguel Antonio Prantilla, chief sa BPMC, nga ang empleyadong nalambigit sa reklamo naghupot sa posisyon nga administrative aide.
Sumala ni Dr. Prantilla, aduna usab mga miaging reklamo batok sa maong empleyado nga gisang-at mismo sa pipila niini kauban sa trabaho tungod sa ubang mga isyu.
Matud pa sa opisyal, ipatawag ang empleyado aron mapahigayon ang pormal nga imbestigasyon ug mahatagan kini og higayon nga ipahayag ang iyang bahin sa mga alegasyon.
Giingon sa BPMC nga ang resulta sa imbestigasyon maoy mahimong basihan sa angayng aksyon nga ipatuman subay sa mga lagda ug polisiya sa ospital.