Masaligon ang National Bureau of Investigation (NBI) nga ilang masumite sa saktong panahon ang mga gikinahanglang dokumento ngadto sa International Criminal Police Organization (Interpol) alang sa pagpagula og Red Notice batok kang kanhi Ako Bicol Rep. Zaldy Co.
Matud ni NBI Spokesperson Atty. Palmer Mallari, dili sila maglisod sa pagpundok sa mga papeles tungod kay ang maong mga dokumento anaa na sa ilang buhatan ug ang uban gikan sa Sandiganbayan, Ombudsman ug Department of Justice.
Gihatagan ang NBI hangtod sa Pebrero 11 isip deadline sa Interpol. Giklaro ni Mallari nga dili na kinahanglan pangmakig-alayon sa kampo ni Co aron makuha ang mga gikinahanglang impormasyon tungod kay public records man kini ug dali rang ma-access sa gobyerno.
Kasamtangan, wala pa gibutyag sa NBI ang eksaktong dapit diin nahimutang si Co, apan nagpadayon ang ilang pakigtambayayong sa mga langyaw nga otoridad pinaagi sa ilang International Operation Division aron masundan ang mga leads sa iyang lokasyon.