Gituohang natural death ang hinungdan sa kalit nga pagtaliwan sa usa ka 88-anyos nga lolo human kini napalgang wala na’y kinabuhi sa tunga sa usa ka katubhan sa Purok 2, Barangay Tubigon, Maramag, Bukidnon, kaganihang alas 5 sa hapon, niadtong Sabado.
Base sa imbestigasyon sa Maramag Municipal Police Station, ang biktima residente sa nahisgutang lugar ug katapusang nakit-ang buhi niadtong Huwebes, Abril 9, 2026, sa dihang milakaw kini gikan sa ilang panimalay nga wala’y pagpahibalo sa iyang mga kabanay.
Daling naalarma ang pamilya sa biktima sa dihang napakyas kini sa pagpauli sa ilang balay. Human sa pipila ka adlaw nga pagpangita, gikasubong nakit-an ang patayng lawas sa biktima sa dapit nga duna’y gilay-on nga kapin kun kulang 500 metros gikan sa iyang gipuy-an.
Sa gihimo nga pagsusi sa kapulisan, wala’y nakit-ang bisan unsang timailhan sa foul play sa lawas sa maong senior citizen. Sa pagkakaron, ang patayng lawas sa biktima anaa na sa kustodiya sa iyang pamilya alang sa saktong lubong samtang nagpabilin ang konklusyon sa mga otoridad nga namatay kini tungod sa katigulangon o natural nga hinungdan.