Lima ka mga senador ang nitingog ug nihangyo kang Senador Ronald “Bato” dela Rosa nga mas maayo pang mosurender na kini sa mga awtoridad. Ang maong panawagan duna’y kalambigitan sa nagpadayon nga imbestigasyon sa International Criminal Court (ICC) bahin sa kampanya batok sa ilegal nga droga niadtong panahon sa administrasyong Duterte.
Matod sa maong mga senador, ang pag-atubang sa proseso sa balaod maoy saktong lakang aron mahatagan og katin-awan ang mga pasangil batok kaniya. Gipasiugda usab nila nga mas mapanalipdan ang integridad sa Senado kon ang mga miyembro niini andam nga mopailalom sa legal nga imbestigasyon. Sa pikas bahin, wala pa’y opisyal nga tubag si dela Rosa bahin niining hagit sa iyang mga kauban sa senado, samtang padayon ang iyang baruganan nga dili siya moila sa gahom sa ICC sa nasod.