CABANGLASAN, BUKIDNON – Kasamtangang nagtingkagol sa selda sa kapulisan ang usa ka 38-anyos nga lalaki human masikop sa akto nga nagbaligya og mga ilegal nga sigarilyo sa Purok 11, Poblacion, Cabanglasan niadtong Mayo 10.
Sa gihimong operasyon sa Cabanglasan Municipal Police Station, nakumpiska gikan sa suspetsado ang lima ka ream sa “Modern” smuggled cigarettes nga nagkantidad og kapin ₱4,000. Nasayran nga wala’y required graphic health warnings ang maong mga sigarilyo, nga klarong paglapas sa Republic Act 10643 o ang Graphic Health Warnings Law.
Ang paghupot sa maong mga kontrabando dakong hinungdan sa pagkasikop sa maong indibidwal, kinsa giturn-over na ngadto sa Municipal Health Office alang sa hustong disposisyon. Kasamtangan na karong nag-ung-ong ang posibleng kaso batok sa suspetsado samtang gihipos na ang mga ebidensya alang sa dugang nga proseso.