Gipasigarbo sa militar nga “zero” kon wala nay ang presensya sa New People’s Army (NPA) sa probinsiya sa Bukidnon.
Sa pakighinabi sa Bombo radyo Malaybalay kang LTCOL. Jeorge R. Jallorina, commander sa 8th Infantry Dependable Battalion sa Philippine Army, gibutyag niini nga napuhag na sa militar ang tanang miyembro sa grupo ni alyas “Reda” nga naglihok sa Bukidnon, lakip ang mga kanunay motabok paingon sa Agusan del Sur.
Sumala sa opisyal, dili na isipon nga hulga sa Bukidnon ang nahibiling mga miyembro sa maong grupo, apan nagpabilin silang hulga sa Misamis Oriental.
Busa, padayon ang tutok sa militar aron mapugngan ang posibleng mga pag-atake ug aron hingpit nang matapos ang insurgency sa Region 10.
Gidugang pa ni Jallorina nga wala nay namonitor nga bag-ong kalihokan gikan sa nahibiling grupo gawas sa ilang paglikay sa mga operating troops.
Padayon usab ang militar sa pag-awhag kanila nga mosurender aron malikayan ang dugang pag-atbangay.
Human gideklarang wala nay armadong grupo nga gigukod sa militar, gitutukan nila karon sa sustainment operations aron mapadayon ang kalinaw ug serbisyo sa mga komunidad nga kaniadto giimpluwensiyahan sa walhong grupo.