Gipadayag sa prosecution nga susihon niini ang nagkalain-laing financial records ni Vice President Sara Duterte aron matino kung legal ba ug adunay klarong tinubdan ang pagsaka sa iyang net worth.
Matud ni prosecution spokesperson ug former representative Robert Ace Barbers, unang gipresentar isip saksi si kanhi Sandiganbayan Presiding Justice Amparo Cabotaje-Tang, nga mipatin-aw sa mga lagda ug probisyon kalabot sa deklarasyon sa assets, liabilities ug net worth sa mga opisyal sa gobyerno.
Sunod nga gipresentar si Atty. Karen Batu sa Records Division sa Office of the Ombudsman, nga mitunol sa mga SALN ni Duterte nga gisumite niini sulod sa iyang pagserbisyo sa gobyerno gikan 2007 hangtod 2025.
Matud pa sa prosecution, wala pa kini nagpasabot nga ilegal ang maong pagsaka, busa gikinahanglan pa ang dugang nga ebidensiya aron masuta kung gikan ba kini sa legal ug lehitimong kita.
Hugot nga gipasabot ni Barbers nga importante ang maong mga dokumento aron mapamatud-an kung ang pagtaas sa net worth nga mikabat sa P98 milyon adunay legal ug lehitimong tinubdan.
Gidugang pa niini nga sa umaabot nga mga adlaw pa nila klarohon pinaagi sa ebidensiya kung legal ba ang maong pagtaas ug kung ang kita sa gobyerno igo ba aron mapasabot ang deklaradong net worth.