Hugot nga gipanghimakak sa 403rd Infantry “Peacemaker” Brigade sa Philippine Army ang mga hungihong ug aleagasyon nga adunay gipahigayong loyalty check sulod sa banay sa mga militar.
Kini ang gipadayag ni Philippine Army Commanding General Lieutenant General Antonio Nafarrete atol sa ika-53 nga anibersaryo sa 403rd Infantry “Peacemaker” Brigade sa Malaybalay City kabahin sa maong isyu.
Gibarugan ni Nafarrete nga walay kamatuoran ang maong mga hungihong ug nagpabiling propesyonal ug apolitical o walay gidapigang partido sa pulitika ang tibuok kasundalohan bisan pa man sa init nga sitwasyon sa nasud.
Sa eksklusibong pakighinabi sa Bombo Radyo Malaybalay, gipadayag usab ni Brigadier General Seigfred Tubalado, Commander sa 403rd Brigade, nga dili na kinahanglan ang maong loyalty check tungod kay ang tanang sundalo adunay panumpa sa Konstitusyon ug nagpabiling matinud-anon sa gobyerno.
Matud niini, propesyonal ang Armed Forces of the Philippines ug wala kini magpalambigit sa mga isyu sa pulitika.