Mga tinagong armas ug bala, narekober sa 4ID sa Bukidnon ug Surigao del Sur

Nakarekober og mga tinagong armas ug mga bala ang 4th Infantry (Diamond) Division sa lain-laing arms cache operations sa Bukidnon ug Surigao del Sur.

Sa Sitio Matangpatang, Barangay Miglamin, Malaybalay City, Bukidnon, nakit-an sa tropa sa 88th Infantry Battalion ang usa ka M4A1 Carbine Rifle, usa ka Cal. .30 Carbine Rifle, duha ka magasin, 138 ka bala sa 5.56mm, 48 ka bala sa Cal. .30 ug duha ka military bags sulod sa usa ka gibiyaan nga payag atol sa military operation niadtong milabay’ng adlaw.

Sumala sa militar, narekober ang maong mga armas pinaagi sa intelligence-driven operation human sa nangaging mga engkwentro sa maong lugar.

Samtang, sa Sitio Tubakon, Barangay Bitaugan, San Miguel, Surigao del Sur, narekober usab sa hiniusang tropa sa 30th ug 36th Infantry Battalion ang tulo ka AK-47 rifles nga adunay gipanagtangtang nga serial numbers gikan sa usa ka tinagong arms cache niadtong Hulyo 13.

Gituohang kabahin kini sa mga armas nga gitago sa Communist Terrorist Group (CTG) sa maong lugar. Matud sa mga komandante sa 403rd ug 401st Infantry Brigades nga ang maong mga operasyon kabahin sa padayon nga kampanya aron mapugngan ang mga armadong grupo sa paggamit og armas nga mahimong hulga sa kalinaw ug kaluwasan sa komunidad.